कालीगण्डकीको कटानले बेनी बजार जोखिममा

१४ साउन । म्याग्दीको बेनीसँग जोडिएको पर्वतको बेनी बजार कालीगण्डकी नदीको कटानले जोखिममा परेको छ ।

माझफाँट वडा नम्बर ३ डाडाँबारीमा रहेको तटबन्ध बाढीले बगाएपछि कालीगण्डकीले धार परिवर्तन गरी कटान सुरु गरेको हो । गत साता वर्षासँगै आएको बाढीले ५० मिटर तटबन्ध भत्काएपछि बस्तीतर्फ पाँच मिटर जमिन कटान भइसकेको छ ।

कालीगण्डकीको कटानका कारण डाँडाबारीका २५ भन्दाबढी घरपरिवार जोखिममा परेका छन् । कालीगण्डकी पारीको म्याग्दी सदरमुकाम बेनी बजारको संरक्षणका लागि तटबन्ध गरिएपनि पर्वतको बेनीतर्फ तटबन्ध हुन नसक्दा नदी कटानको जोखिम बढेको छ ।

नगरपालिकाका लागि प्रस्तावित पर्वत बेनी क्षेत्रको संरक्षणका लागि तटबन्ध र नदी नियन्त्रणको योजनालाई प्राथमिकता दिनुपर्ने स्थानीयवासीको माग छ ।