पूर्वराजाले अँध्यारो कुनाबाट चलखेल गरिरहेको एमाओवादी अध्यक्ष प्रचण्डको आरोप

१० साउन । एकीकृत माओवादीका अध्यक्ष पुष्पकमल दाहाल प्रचण्डले १२ बुँदे समझदारीका सहयात्री दलहरु मिलेर चुनाव गर्नुको विकल्प नभएको बताउनु भएको छ ।
पार्टी कार्यालय कोटेश्वरमा भएको कार्यक्रममा पूर्वराजा ज्ञानेन्द्र शाहले समेत अध्याँरो कुनाबाट चलखेल गरिरहेको भन्दै उनलाई इतिहासको कठघरामा उभ्याउन पनि चुनाव गर्नुपर्ने बताउनु भयो । उहाँले १० वर्षे जनयुद्धको नेतृत्व गर्ने नेकपा–माओवादीले समेत पूर्वराजासँग मिल्ने कुरा गरेकोमा आफू आश्चर्यचकित भएको बताउनु भयो । अध्यक्ष प्रचण्डले परिवर्तनका पक्षधरहरु सामन्ती र निरङ्कुशताका विरुद्धमा एकताबद्ध हुने बेला आएको जिकिर गर्नुभयो ।

उहाँले परिवर्तनका पक्षधरहरुले दोश्रो संविधानसभाको चुनावमा बहुमत ल्याएमात्र संविधान बन्ने दाबी गर्नुभयो । अध्यक्ष प्रचण्डले नेपालमा शक्तीशाली कम्युनिष्ट केन्द्रको आवश्यकता रहेको बताउदै त्यसका लागि सम्पुर्ण शक्तीहरु एकजुट हुनुपर्ने बताउनुभयो । उहाँले सातांै महाधिवेशनपछि पार्टी एकताबद्ध भएर चुनावमा जान लागेको दाबी गर्नुभयो ।